إعلان

سحرسعيد تكتب”ضوء أحمر”… احنا بنربي ولادنا غلط 

0 74

بص ياسيدي وياستي مافيش فى الدنيا أجمل من ان ربنا ينعم عليك بالأولاد بنين وبنات ويكبروا معاك ويبقوا سندك وضهرك ويملوا عليك الدنيا ويخلوك تحس ان تعبك فى الدنيا ليه سبب وجيه وحد فى الآخر هايستفيد من حياتك وحتي بعد مماتك والا احساسك وحش لما تحس انك فى الدنيا وتعبك وجريك وشقاك مالوش لازمة غير عند اللى هايعرف يستغلك وبس
جميل
بس العيال دي محتاجة تتربي صح علشان انت نفسك بكرة وبعده تستفيد من تربيتهم التمام قبل ما حد غيرك يستفيد
وبالنسبالنا فى مصر مثلا او كتير من عالمنا العربي عندنا حبة مفاهيم عن العيال وعن التربية بصراحة تودي فى ستين داهية
خلينى اتكلم عن حاجة منهم دلوقتى ويمكن ربنا يكرمنى واتكلم بعدين عن الكام حبة الباقيين
.
دايما نسمع من الام الجامدة او الأب الفتوة وهو بيربي جملة شهيرة فى التعامل مع العيل العنيد وبالذات مثلا فى موضوع الأكل اللى بيبقى مش عاجبه
(سيبه لحد ما الجوع يقرصه وهاييجي ياكل )
.
ايوة كدة بقي خليك ولا خليكي اب او ام جامدين واكسروا دماغ الواد ولا البت علشان تعرفوا تربوهم وما يطلعوش متنمردين ويغلبوكوا بعدين
.
اسمحلى اقولك بميزان علم النفس
سيادتك بتمارس جريمة نفسية مكتملة الأركان … إيه هي بقى ؟
انك بسلامتك وانت في طريقك لسحق ابنك او بنتك باسم التربية بتكسر وبتمسح قدرته النفسية علي الثبات وقوة شخصيته وبتعلمه انه ازاي يستسلم ، وان فكرة القرار عنده فكرة هزلية مطلوب منه يتنازل عن قراره اول ما يحس بالألم من هذا القرار
.
الحكاية دي ببساطة بتصنع شخصية ضعيفة ومهزوزة ومالوش كلمة وبعدييييين فى المستقبل هاتستغرب ويمكن تتصدم لما تلاقي ابنك او بنتك بيبيعك كأب أو كأم لانه ضعيف مع مراته اللى مش طايقاكم أو ضعيفة قدام جوزها اللى مسيطر عليها ومنسيها اهلها
.
طيب الكلامك حلو بس نفهم من كدة ان انت عاوزنا نسيب العيال بعبلها وقرفها ويطلعوا متنمردين وقللات ادب وكل ما يقعد يعيط على حاجة ولا ينشف دماغه انا اللى استسلمله ويمشينا وراه بمزاجه
.
لا لا لا انا مقولتش كده.. ابسلوتلى
اللى انت محتاج تعرفه ان ربنا لم يضع هذه الصفات في العيل الصغير ده لشر او بدون حكمة
تخيل بقى ان عند ابنك ونشفان دماغه نقطة رائعة وميزة لصالحك فى تربيته التربية السليمة وهي انك تستغل العند ده وتزيد فيه قدرته على قوة الشخصية والقدرة على التمسك بمبدأة وهو عن طريق وضع الشروط
ليس المطلوب ان تعلمه كيف يستسلم ولكن عليك ان تستغل تمسكه بما يريد فتقوم بتحقيق ما يريده له ولكن بشروط
وهنا حنفية فوايد واتفحت يامعلم
اولا علمته ان يتعلم ان الحياة مش بقلاوة وهات هات هات
علمه انه لو كان فعلا عاوز اللى هو عاوزه يبقى عليه يعطي مقابل للحصول عليه
ان شالله يكون المقابل ده انه يقوم بخدمات داخل البيت او يروق اوضته او يحوش من مصروفه جزء من تمن الى هو عاوزه وانت هاتكمل الباقى ….. الخ
.
يبقى الواد اتعلم المسئولية واتعلم الرجولة واتعلم ان لو كان صادق فى اللى هو عاوزه يبقى يبذل الجهد للحصول عليه
.
وبس ياسيدي
ابوس ايديك – بلاش تعلم ابنك الاستسلام وتجبره عليه
خسائر ابنك فى حياته مرعبة ومخيفة وبتصنع منه شخصية مسخ لا يمكن الاعتماد عليه ولا حتى يعرف يعتمد على نفسه
وكل عيب تراه فى ابنك تقدر تحوله ميزة فى طريقك لتربيته
وعيش وربنا يفرح قلبك بابنك وتشيل احفاده

قد يعجبك ايضا